مشكلتي مع "المتميزين" و "الموهوبين" 😏

· · 197 كلمة · 1 دقيقة قراءة

دايماً المشهور في أى مجال بيلقب بالمتميز أو الموهوب، ويبدأ اللى حواليه في تمجيد وتعظيم صفاته ومواهبه الفطريه العبقريه .. هو ده اللى مضايقك ؟

لأ، اللى مضايقني إن الطريقة دى بتبعت رسالة غلط للناس 😑 الرسالة اللى بيبعتها “الموهوبين” إن المجال الفلاني سهل (طبعاً عشان الباشا موهوب بالفطرة) ، أما اللى حوالين الموهوب يتكلموا إن اتقان المجال ده مستحيل وحاجه معجزيه ان الباشا موهوب .. وبكده الشخص الجديد في المجال لما يحاول ويلاقي النتائج ضعيفه ، يقتنع إنه مش موهوب وإن المجال مش بتاعه ولما يجرب مجالات كتير ويوصل لنفس النتيجة يفتكر إنه فاشل ومش موهوب وغبي ومتخلف وليلة كبيرة من الاحباط واليأس 🤦🏻‍♂️

لكن الحقيقة إن مفيش حد اتولد موهوب ومشهور ومتميز وناجح ✋ دي الحقيقة .. حتى لو كان مجالك محتاج قدرات جسدية معينة فلازم اجتهاد وتدريب وتحسين في مهاراتك بمرور الوقت وفي يوم هتوصل 👌

الموضوع مش سهل ، لكن يمكن تحقيقه. انت تقدر لكن محتاج تدى وقت ومجهود للعمل بتاعك عشان تتعلم وتتقن المهارات الخاصة بعملك.

بلاش تقع في فخ ان الناجح ناجح والفاشل فاشل والكلام الفارغ ده .. اتعلم مجالك كويس واديله وقت ومجهود مستمر وهتكون متميز .. وبلاش تصدق وهم المسوقين 😏 وبتوع التنمية البشرية 😁 والموهوبين 😑 والمتميزين 🤭

مشاركة: