أفضل تطبيق لطلب الأكل
صعب نحدد أفضل تطبيق لطلب الأكل ! في تطبيقات كتيرة خالص زي أوبر للأكل ، و أطلب ، و إلمنيوز ، و أكلني ، .. إلخ. هتلاقي كل المطاعم من هنا . بس ممكن تجرب كل التطبيقات دي وتحدد أنهي أفضل ليك وتستخدمه. طب انت ليه كاتب بوست طالما أنا هجرب وأعرف لوحدي ؟
أنا كاتب البوست ده عشان نفكر مع بعض ليه مينفعش نقول ده أفضل وخلاص كده كلنا نجيب منه. ليه يا عم؟
عشان لازم يكون في تنافس وتنوع. لما يكون في تنافس المطاعم تقدم وجبات أفضل من حيث الجودة والسعر لأنه لو معملش الأفضل محدش هيشتري منه بعد كده. ايه اللى يضمن إنه يحسن من جودة وسعر الوجبات ؟ إننا نفضل نتعامل معاه ومع غيره بس دايماً نشتري اللى مفيد لينا مالياً وصحياً وبكده نعمل توجه صحي عند أصحاب المطاعم.
كمان في حاجه تانية وهي نوع الوجبات المعروضة في التطبيق. مش كل التطبيقات فيها الوجيات اللى انت عايز تطلبها. عشان كده هتحتاج تستخدم أكتر من تطبيق. ليه ميبقاش في تطبيق واحد تطلب منه أى وجبه ويجيلك من المطعم المتخصص في الوجبة دي؟
الفكرة حلوة ، لكن بعد ما تتطبق هيكون في حاجة اسمها احتكار وسيطرة على السوق (monopoly) ، والتطبيق اللى هيسيطر هيتحكم في السوق بشكل كامل وده غلط لأنه لو زود سعر الوجبة أو قللها محدش هيلاقي بديل وبكده كل الناس هتوافق أو تسكت!! لكن الحل هو وجود بدائل ومنافسة .. ده الحل في حالة النظام الرأسمالي.
لازم نضمن دائماً وجود بدائل للشركات والمطاعم والبرامج والمواقع اللى بنستخدمها عشان يكون في منافسة ونوصل لأفضل سعر وجودة للمنتج أو الخدمة المقدمة. وعشان كده هتلاقي في استجواب بيحصل في الكونجرس الأمريكي للشركات الكبرى عشان احتكار السوق. وكمان في الإتحاد الأوروبي بيكون في عقوبات على الشركات المحتكرة مجال أو سلعة معينة.
في كلمة مشهورة في أمريكا وهي vote with your money ومعناها صّوت بفلوسك. يعني ادعم الشركة أو الشخص عن طريق التعامل معاه مالياً. اشتري من المكان اللى عايزه يكبر. لكن لو في مكان بيعمل أفعال مضرة بالبيئة أو بيسيطر على المجال أو مش بيطور من المجال أو مش بيقدم قيمة مناسبة مقابل السعر أو مش بيدعم إصلاح منتجاته .. إلخ ، المكان ده متشتريش منه. اشتري من البديل بتاعه لو كان البديل أفضل.
أهم مشكلة في المطاعم والوجبات 🔗
من أسوأ المشاكل الموجودة حالياً في مجال المطاعم هي عدم توفر وجبات صحية. محدش مهتم إن كانت الوجبة صحية ولا لأ. كل المهم هو شكلها حلو عشان الصور والإعلانات، وطعمها حلو و سبايسي (spicy). المطاعم بتستخدم أى شئ !! محدش بيشوف المطبخ !! الرقابة مش هينفع تقعد في المطاعم دايماً .. الحل هو تشجيع البدائل والبعد عن الإحتكار بقدر الإمكان.
أنا واثق إن بمرور الوقت هيكون في وجبات صحية ، بيستخدم فيها زيوت أفضل من الزيوت الحالية ، .. إلخ. الموضوع محتاج تشجيع من الناس وشجاعة من بعض الأطباء والطباخين لبدء مطعم بمواصفات علمية وصحية.
إن كنت تفضل مشاهدة الفيديو أكثر من قراءة المقالات، اشترك في القناة على اليوتيوب من هنا . لمزيد من المعلومات عن البرمجة ولينكس وأندرويد وويندوز وماك وآيفون وتصميم المواقع، ابحث عن “موقع أبانوب حنا للبرمجيات” على جوجل وادخل للموقع وستجد موضوع جديد يشرح فكرة أو معلومة جميلة ومفيدة كل يوم.
