كيف تصنع تريند على السوشيال ميديا ؟

· · 737 كلمة · 4 دقيقة قراءة

التريند (trend) هو شئ مهتم بيه عدد كبير جداً من الناس على السوشيال ميديا. التريند ممكن يكون طريقة عمل فيديو ، أو طريقة نطق ، أو تسريحة شعر ، أو طريقة تصميم صور ، أو طريقة تصوير للصور الفوتوغرافية ، أو جاكت ، ..

ليه تهتم بإنك تعمل ترند ؟ 🔗

لو انت متخصص في التسويق على السوشيال ميديا ، فـ ده شئ مفيد جداً ليك إنك تعمل ترند أو تشارك في ترند على فيسبوك أو تويتر. لأنك لما تعمل ترند (trend) أو هايب (hype) تقدر توصل فكرتك أو اسمك لناس كتير جداً ع النت بفلوس قليلة مقارنةً بنسبة الوصول.

شركات الموبايلات زي سامسونج ، وآبل ، وشاومي، وأوبو ، وباقي الشركات بيعملوا هايب (hype) أو ترند عن الموبايل الجديد اللي هينزل السنة دي مثلاً عن طريق انهم يبعتوا الموبايلات للمراجعين (اليوتيوبرز) قبل يوم مؤتمر الإعلان عن الموبايل بأسبوع. ويقولولهم لازم ينشروا فيديو عن الموبايل في يوم المؤتمر. وبكده يبقوا خلوا الموبايل ترند (هايب هم اللي عملوه) ووصل لعدد كبير من الناس.

إزاي بيحصل التريند على السوشيال ميديا ؟ 🔗

التريند هو انتشار شئ على الإنترنت بمشاركة آلاف الناس. يعني حاجه جذبت انتباه ملايين الناس وشجعت آلاف منهم إنهم يشاركوها.

طب إيه الحاجات اللي ممكن تجذب ملايين من الناس؟ لازم تكون حاجة غريبة .. زي انتش واجري ؛ لأنها بتشجع الناس على التنمر وتحسسهم إنهم أفضل منه. أو تكون حاجة شكلها غريب أو مخيف أو جميل جداً أو .. إلخ.

طب إزاي أخلى الناس تشارك في التريند بعد ما ينجذبوا ليه؟ خلي الموضوع سهل المشاركة فيه ؛ وفر المنتج اللي عليه التريند ، ونزل مشاركات متنوعه عن التريند عشان الناس تبدأ تقلدك وتلاقي أفكار للمشاركة.

إزاي تعمل تريند ع السوشيال ميديا ؟ 🔗

  • 👈 لازم يكون التريند اللي عايز تعمله محبب لفئة كبيرة من الناس
  • 👈 لازم يكون التريند اللي عايز تعمله محبب للمؤثرين والمشاهير ع السوشيال ميديا
  • 👈 لازم توصل التريند اللي عايز تعمله إلى ١٠ آلاف مهتم ع الأقل وبعدها هيزيد في الإنتشار لوحده
  • 👈 لازم تكون فكرة التريند بسيطة وفي نفس الوقت فيها شئ جديد وحديث
  • 👈 تعاون من أصدقاء وزملاء مؤثرين ع السوشيال ميديا
  • 👈 شارك التريند على صفحات وجروبات تانية مهتمة
  • 👈 شجع الناس على المشاركة في التريند

ازاي بقا تعمل ترند (هايب) ؟ 🔗

اختار فكرة ليها علاقة فكرياً أو جغرافياً بيك 🔗

اختار ترند قريب من مجالك واعمله. الموضوع محتاج شوية بحث ومتابعة للترندات اللي بتحصل يومياً. وبعد كده تعمل ورشة عمل وعصف زهني (brainstorming) لحد ما توصل لفكرة ترند حلوة وفيها كل المواصفات المطلوبة. ومن المواصفات دي إن الفكرة تكون ليها علاقة بمجال عملك ، أو منتجاتك ، أو ليها علاقة بمكان عملك.

اكتب الموضوع بشكل يشجع على التفاعل 🔗

كتابة الكومنتات والشير. يعني المحتوى يكون بيتكلم عن موقف معين بيحصل للجمهور المستهدف بتاعك. زي مثلاً إنك تنسى تاخد الفاتورة مثلاً ، بالمناسبة هتلاقي ترندات كتير عن النسيان.

لابد من استخدام صورة واحدة على الأقل ، أو فيديو 🔗

الصور والفيديوهات أفضل من الكلمات. عشان تزود انتشارك استخدم الصور والفيديو. حاول تستخدم صورة واحدة. والصورة دي فيها كلمات قليلة خالص ، والأفضل يكون مش عليها أي كلمات.

لابد من التركيز على العواطف والمشاعر 🔗

لابد من التركيز على العواطف والمشاعر .. مضحك ، محزن ، .. وهكذا. انك تكون حاسس بمعاناة مندوب المبيعات ده بيخلي المندوبين يشيروا الكوميك (comic) أو الميم (meme) أو البوست بتاعك عموماً.

الانتماء 🔗

الانتماء. خلي محتوى الترند ينتمي لطائفة من الناس زي الأهلاوية مثلاً أو الزملكاوية أو محبي القهوة أو محبي السهر أو الاسكندرانية أو المهندسين أو البنات أو الشباب .. إلخ.

استخدم هاشتاج سهل وواضح 🔗

استخدم هاشتاج سهل وواضح ، ولو هتركز على فيسبوك بس ممكن تستغني عن الهاشتاج. الهاشتاج بيكون حلو على تويتر أكتر من فيسبوك. لكن بشكل عام استخدم كلمات واضحة وملهاش طرق مختلفة في الكتابة ، لأن طرق الكتابة المختلفة هتخلي الهاشتاج يتقسم لأكتر من هاشتاج وده هيخلي الترند صعب الوصول والاستمرار.

لازم توصل لـ ١٠ آلاف متفاعل عشان يحصل الترند 🔗

لازم توصل لـ ١٠ آلاف متفاعل عشان يحصل الترند. التريند هيحصل لو الناس شاركت فيه ، وشاركته على الجروبات ، وعملوا تصميمات جديدة تقليد للترند. حاول توصل لأكبر عدد من الناس اللي بتنشر كتير عشان يشاركوا في الترند. من الأفضل كمان انك تشارك الترند في الجروبات اللي هتحب الترند زي جروبات العاملين في مجال التسويق والترويج والإعلانات.

إن كنت تفضل مشاهدة الفيديو أكثر من قراءة المقالات، اشترك في القناة على اليوتيوب من هنا . لمزيد من المعلومات عن البرمجة ولينكس وأندرويد وويندوز وماك وآيفون وتصميم المواقع، ابحث عن “موقع أبانوب حنا للبرمجيات” على جوجل وادخل للموقع وستجد موضوع جديد يشرح فكرة أو معلومة جميلة ومفيدة كل يوم.

التصنيفات: تسويق ودعاية
مشاركة: