ايه هى هجمات الـ DDoS والـ DoS ؟
ايه هى هجمات الـ DDoS ؟ 🤔 🔗
فيه نوعين منهم، هجمات الـ DoS وهى اختصار لـ Denial-of-Service يعنى دى هجمات غرضها ايقاف خدمات الموقع عن طريق استهلاك كل طاقة السيرفر فى الهجمة. ودى بتتم عن طريق إن واحد يعمل طلبات (requests) لخدمة معينة أو صفحة معينة على موقع محدد كتييير جداً بحيث يستهلك كل طاقة استجابة الإستضافة (host) أو السيرفر (server).
لكن هجمات الـ DoS ممكن نوقفها بسهولة عن طريق حجب مؤقت للـ IP بتاع الجهاز اللى بيهاجمنا. وبكده وقفنا الهجوم والموقع يفضل شغال عادى.
النوع التانى هو DDoS وده اختصار لـ Distributed Denial-of-Service وهو عبارة عن استخدام آلاف أو ملايين الأجهزة لعمل هجوم على صفحة معينة أو خدمة معينة. الموضوع ده صعب الحماية ضده ﻷن فى IP كتير محتاجة تتحجب. وصعب نعرف إن كان الـ IP ده مشارك فى الهجمة ولا بيتصفح الموقع عادى.
خطورة الـ DDoS كمان تكمن فى إنك بتشارك فى الهجمة وانت غالباً متعرفش! .. الله إزاى؟ 🤨
اللى بيعمل هجمات الـ DDoS ده بيكون مخترق مجموعة من الأجهزة عن طريق برمجيات خبيثة إسمها RAT وبيكون منهم Botnet ويتحكم فيهم على بعض. يأمر كل الأجهزة اللى بيتحكم فيهم بأنهم يدخلوا على الموقع الفلانى مثلاً فيدخلوا فوراً.. وهكذا.
ميزة DDoS عن الـ DoS إنها Distributed يعنى متوزعة على أجهزة مختلفة مش من جهاز واحد.
وده بيعرّض أصحاب الأجهزة اللى مصابين بالبرامج الخبيثة لـبطء الإنترنت والمساءلة القانونية (فى بعض الدول) وكمان لـحجب بعض المواقع من عندهم.. زى إن الهاكر يستخدمهم فى عمل هجوم على موقع التربية والتعليم مثلاً.. فتلاقى نفسك مش قادر تدخل على موقع الوزارة ﻷن الـ IP بتاعك اتحجب.. وهكذا مشاكل كتير أهمهم التلاته اللى قلتهم.
لما تلاقى موقع معين مش راضى يفتح معاك لكن بيفتح عند باقى الناس إعمل ريستارت للراوتر عشان تاخد IP جديد.. وبس كده هتلاقى الموقع إشتغل معاك 😉
أشوفكم فى بوست تانى مفيد إن شاء الله ❤ على صفحة موقع أبانوب حنا للبرمجيات على الفيسبوك، وكمان هنا على الموقع. لو عايز تتابع الموضوعات الجديدة انضم لقناتي على تيليجرام .
