أفضل طريقة لعمل إعلان ناجح على بحث جوجل

· · 707 كلمة · 4 دقيقة قراءة

خلينا نفكر مع بعض الأول .. لو أنت كنت بتبحث عن “أفضل معجون أسنان” ولاقيت نتائج بحث كتيرة طبعاً وهم كالتالي :

  1. “معجون الأسنان الذي ينصح به الأطباء”
  2. “أفضل معجون أسنان”
  3. “أفضل معجون أسنان لتبييض الأسنان”
  4. “الدكتور فلان الفلاني ينصح بإستخدام معجون أسنان مع نصائح أخرى”
  5. “أفضل معجون أسنان ينصح به أطباء الأسنان”
  6. “كيف تختار معجون أسنان”
  7. “الاختيار الأفضل .. الدكتور فلان يخبرنا بأفضل معجون أسنان في مصر”
  8. “رأي أطباء الأسنان في معجون الأسنان وأفضل طرق للعناية بالأسنان والفم”
  9. “أفضل معجون أسنان للأطفال”

ما هي نتيجة البحث التي تضغط عليها لتقرأ ؟ هل ستضغط على أول نتيجة أم ثاني نتيجة .. أم أي نتيجة منهم ؟

خلينا نفهم بس انت اخترت إزاى ؟ عشان نعرف الناس عموماً هتختار إزاى ؟

أول نتيجة اللى هي “معجون الأسنان الذي ينصح به الأطباء” تدل على نية الباحث أو هدفه. يعني الناس بتختار من نتائج البحث اللى بيرد على سؤالهم اللى في دماغهم .. مش بالضرورة يكون بنفس النص اللى هم كاتبينه. يعني احنا بحثنا عن “أفضل معجون أسنان” لكن اخترنا “معجون الأسنان الذي ينصح به الأطباء” ودخلنا نقرا المقال ده عادي برغم إنه مش بنفس العنوان .. لكن احنا أصلاً عايزين نعرف أفضل معجون أسنان واللى هينصح به الأطباء هيكون أحسن واحد طبعاً .. يعني العنوان بيساعدنا نلاقي إجابة على سؤالنا برضو.

بعض الناس هتدوس على العنوان التاني وهو “أفضل معجون أسنان” لأنه يعتبر أكتر عنوان دقيق ومباشر لسؤالهم.. وده اختيار حلو برضو .. وبكده هنقدر نوصل لإجابة سؤالنا برضو.

باقي نتائج البحث هتلاقي فيها إضافة معينه بجانب النية الأساسية من البحث .. النية الأساسية من البحث هي معرفة أفضل معجون أسنان .. لكن بعض النتائج بتديلك ثقة أكبر عن طريق كتابة اسم الطبيب اللى بيعطي النصيحة ، وبعض نتائج البحث بتديلك نصائح إضافية عن العناية بالفم والأسنان ، وبعضهم بيدّي نصيحة عن أفضل معجون أسنان لفئة عمرية معينة ( زي الأطفال مثلاً ).

طب انت دخلتنا في قصة طويلة عريضة ومعرفناش أفضل طريقة لعمل اعلان ناجح على جوجل ؟؟؟

موضوع اختيارنا لنتائج البحث عن معجون أسنان هيساعدنا نعمل إعلان ناجح على بحث جوجل. كل الفكرة إننا هنعمل حملة إعلانية على إعلانات جوجل (Google Ads) اللى كان إسمه زمان جوجل آدوردس (Google Adwords). وهنختار ظهور الإعلانات في بحث جوجل فقط.

بعد ما نعمل الحملة الإعلانية هنضيف جواها إعلانات بعناوين ووصف ولينك مختلف. هنا نقف! إزاى هنكتب الإعلان والكلمات المستهدفه اللى هيظهر عليها الإعلان. الفكرة اللى هتخلي الإعلان ينجح على بحث جوجل هي إننا هنكتب عناوين ووصف بنفس النص اللى الناس بتبحث عنه ونستهدف نفس النص كـ كلمات مفتاحية (keywords). وكمان هنعمل إعلان تاني عنوانه بيرد على نية الباحث عن الكلمات المفتاحية — زى أول نتيجة في مثال معجون الأسنان.

يعني هنعمل ايه ؟

هنعمل أكتر من إعلانين. يعني تلات اعلانات .. أربع اعلانات .. أو أكتر. كل إعلان بيستهدف جملة بحث معينة (key phrase) مكتوبة في عنوان الإعلان واستهدافه. وبكده اللى يبحث عن الجملة دي تحديداً يظهرله الإعلان وبكده يكون احتمال أكبر إنه يضغط على الإعلان ويقرا المقال على موقعك.

بالإضافة إننا هنعمل بعض الإعلانات بعنوان بيدل على نفس نية البحث — زي أول نتيجة في البحث عن معجون أسنان. يعني لو بتستهدف ناس بتبحث عن “أفضل استضافة لموقع مكتوبة بلغة جو” ، ممكن تستهدف الجملة دي ، وتكتب العنوان “أرخص استضافة للمواقع المكتوبة بلغة جو - شرح كامل” .. العنوان ده بيجاوب على سؤال الباحث وكمان هيديله الشرح بالخطوات لإستضافة الموقع.

يعني بلاش نكتب عنوان من دماغنا لما نيجي نستهدف الناس اللى بتبحث عن شركتنا. الناس متعرفش المصطلحات الخاصة بالبزنس بتاعك. حاول تشوف الناس بتبحث عن ايه وايه الكلمات اللى بيستخدموها ووصلهم احساس إنك بترد على سؤالهم بالظبط وعارف هم عايزين ايه وهتعمله أو هتشرحه ليهم. هى دي أفضل طريقة لعمل حملة إعلانية ناجحة تظهر على بحث جوجل.

الخلاصة:

لما تعمل حملة إعلانية ، اختار عناوين الإعلانات اللى جوه الحملة الإعلانية كالتالي:

  1. استخدم نفس الجملة اللى بيبحث بيها الناس على جوجل ، وحط نفس الجملة في الإستهداف
  2. استخدم جملة ترد على نفس السؤال اللى بيكتبه الباحث على جوجل ، وحط الجملة الأصلية اللى بيبحث عنها في الاستهداف
  3. حاول تعمل أكتر من تلات إعلانات في الحملة الإعلانية بتاعتك

خلصنا خلاص. إن كنت تفضل مشاهدة الفيديو أكثر من قراءة المقالات، اشترك في القناة على اليوتيوب من هنا . لمزيد من المعلومات عن البرمجة ولينكس وأندرويد وويندوز وماك وآيفون وتصميم المواقع، ابحث عن “موقع أبانوب حنا للبرمجيات” على جوجل وادخل للموقع وستجد موضوع جديد يشرح فكرة أو معلومة جميلة ومفيدة كل يوم.

التصنيفات: تسويق ودعاية
مشاركة: