ازاى تسوّق لمنتج شركتك برغم وجود شركات تانية مشهورة أكتر من شركتك؟

صعب جداً تتفوق على الشركات الكبيرة المشهورة .. فعلاً صعب.. لكن مش مستحيل وممكن تكسبهم وتتفوق عليهم كمان!! .. إزاى؟ 🤔

انت محتاج تفكر بطريقة ذكية .. فكّر out of the box .. بلاش تمشى زى ما الناس ماشيه .. بلاش تفكر زي ما الناس بتفكر .. بلاش تعمل اعلانات زى ما الناس بتعمل!!!

انت محتاج تفكر فى ميزة مش موجودة فى الشركات الكبيرة المنافسة لشركتك، وتفكر كمان إزاى تغير الملعب اللى بتتنافسوا فيه .. اعمل قواعد جديدة للتنافس تبقى شركتك فيها اللى مميزة.. ابدأ بـ مساحة صغيرة سهل تكسبها ومنها لمساحة مجاورة وهكذا.

مثال عملى عشان الكلام يكون واضح أكتر.. لو انت شركتك متخصصة فى تركيب وإصلاح فلاتر تنقية المياة .. يبقى الميزة التنافسية تكون فى التخفيضات أو خدمة ما بعد البيع أو الإتنين مع بعض.. يعنى أنت هتقول كل المميزات لكن هتركز على الميزة بتاعتك إنك قريب من المستخدم وتغيرله المراحل فى مواعيدها وسرعة فى الصيانة فى حالة حدوث أى أعطال فى المنتج.

عرفت الميزة 👌 طب ايه موضوع تغيير الملعب؟ 🤔 انت غيرت الملعب وقواعد اللعب خلاص 😉 الله إزاى؟؟؟ 🤔 انت لما ركزت على مميزاتك اللى هى عيوب الشركات الكبيرة كده انت كسبت بقواعد انت عملتها ونافست وكسبت قدام عملائك 💪

طيب و__موضوع المساحة الصغيرة ده؟؟؟__ 🤔 ده معناه إنك هتركز انتشارك فى مدينة واحدة الأول .. وبعد ما تكسب المدينة تدخل على المدينة اللى بعدها .. ﻷن تركيز المجهود ده هيفيدك فى حاجتين..

• هتقدر تقنع عدد كبير فى نفس المدينة بشراء المنتج وبكده وصلت لـ عدد كبير من العملاء
• كل العملاء فى نفس المكان وبكده انت بنيت سُمعة تقدر تنتشر بالسُمعه دى فى المدن المجاورة بشكل أسهل

المهم انك تعرف ازاي تستهدف المدينة دى بالدعاية فى الواقع والتسويق على الإنترنت والإعلانات 😉