ليه تعمل ويبسايت لشركتك ؟

· · 859 كلمة · 5 دقيقة قراءة

الموقع الإلكتروني أو الويبسايب (website) هو قناة التسويق الوحيدة التي تملكها فعلاً. قنوات التسويق هي أي وسيلة تصل بها للعملاء مثل صفحة فيسبوك ، أو حساب انستجرام ، أو قناة يوتيوب ، أو جروب فيسبوك ، أو حساب تويتر ، .. كل هذه قنوات تسويق يُمكنك استخدامها للوصول للجمهور المستهدف.

أي استخدام لموقع إلكتروني غير الويبسايب الخاص بيك أو بالبزنس بتاعك فيه بعض المخاطرة. ممكن الموقع ده يقفل أو يتوقف عن الخدمة لأي سبب. لو انت شايف إن ده مستحيل، ده خبر إن فيسبوك توقف لمدة ٦ ساعات بكل خدماته الخاصة بالفيسبوك والماسنجر وانستجرام وواتساب . وكمان قبلها توقفت خدمة الشات في فيسبوك وانستجرام وده لينك الخبر . هو فعلاً صعب إن الفيسبوك يتوقف لكن مش مستحيل ! خلي بالك موقع ماي سبيس ( https://myspace.com ) كان مشهور جداً من أكتر من ١٠ سنين، وكمان المنتديات كانت مشهورة جداً .. حالياً محدش بيستخدم المنتديات ولا ماي سبيس!

لكن مش دي المشكلة الحقيقية! لأن لو معظم الناس نقلت من الفيسبوك لموقع تاني أو خدمة تانية فـ ده هيحصل على فترة زمنية كبيرة بشكل كافي لإنك تاخد بالك وتنتقل معاهم. المشكلة الحقيقية إنك لا تملك صفحتك على فيسبوك .. الموضوع عامل زي حق الانتفاع .. مش الملكية. يعني في أي وقت فيسبوك هيشوف إن صفحتك على فيسبوك مش متوافقة مع سياساته هيلغي نشرها (unpublish) أو يحذفها.

ممكن كمان يمنعك من عمل الإعلانات على فيسبوك ، أو حتى يعمل إيقاف للحساب الإعلاني بتاعك على فيسبوك. ممكن كمان يحذف حسابك بالكامل من فيسبوك لأنك تخالف سياسات فيسبوك. نفس الكلام ده ينطبق على انستجرام و واتساب. انت ممكن تحس إن الكلام أوڤر ! لكن دي الحقيقة وتقدر تشوف تجارب الناس اللي حواليك على الإنترنت.

الحل الأفضل هو تعدد قنوات التسويق للبزنس بتاعك بالإضافة إلى التركيز على قناة التسويق اللي انت تملكها – اللي هي موقعك الإلكتروني. الموقع الإلكتروني (الويبسايت) بيديلك مميزات إضافية عن باقي قنوات التسويق الأخرى ، ودي بعض مميزات الويبساب.

التحكم 🔗

تقدر تتحكم الويبسايت ؛ تقول اللي انت عايزه ، تتكلم عن شركتك زي ما انت عايز ، تعمل هوية شركتك بالشكل اللي انت عايزه (brand identity).

التواصل مع المتابعين عن طريق الإشعارات 🔗

تقدر تتواصل مع المتابعين عن طريق إنك تبعت لهم إشعارات (notifications) بالمنتجات الجديدة أو تخفيضات موسمية.

التواصل عن طريق القائمة البريدية 🔗

تقدر تعرض على زوار موقع شركتك إنهم يضيفوا البريد الإلكتروني (الايميل) بتاعهم للقائمة البريدية عشان انت تبعتلهم التحديثات المهمة والأخبار والتخفيضات والمنتجات الجديدة. وبكدة تقدر توصل للناس بسهولة – حسب مجال عملك والجمهور المستهدف طبعاً.

لو انت صاحب شركة برمجة ، أو شركة تسويق ، أو مكتب شؤون قانونية ومحاسبة فـ الطريقة دي مناسبة ليك ، لأن معظم العملاء المحتملين بيشتغلوا بالإيميل وده وسيلة تواصل مهمة لشغلهم.

بناء البراند 🔗

الموقع الإلكتروني (الويبسايب) جزء أساسي من البراندينج والـ brand identity بتاعة شركتك.

الصورة الكاملة عن الشركة والمنتج 🔗

لما تدخل على صفحة شركة على فيسبوك بتحتاج إنك تقرا بوستات كتير عشان تعرف الشركة دي بتعمل ايه وبتبيع ايه للناس. لكن انت ممكن من صفحة واحدة على ويبسايت الشركة تفهم هي بتبيع ايه ومواصفاته والعنوان وطرق الدفع كمان.

بناء الثقة 🔗

وجود موقع إلكتروني بيدي ثقة للعملاء والشركات الأخرى.

سهولة الوصول للبزنس بتاعك 🔗

بمجرد كتابة اسم شركتك على جوجل هيظهر الويبسايت الخاص بشركتك. هو كده وصل لشركتك مباشرة.

وصول الناس ليك من خلال البحث عن الخدمات والمنتجات (السيو) 🔗

لو انت عامل شغل سيو كويس في الويبسايت ، الناس اللي بتبحث عن المنتجات والخدمات اللي انت بتقدمها هتوصلك من بحث جوجل و بنج. السيو هو SEO وهي اختصار لـ search engine optimization يعني “التحسين لمحركات البحث”. وده في ناس متخصصة فيهم تلاقيهم في شركات التسويق الإلكتروني.

مندوب مبيعات شغال ٢٤ ساعة في اليوم 🔗

أي مندوب مبيعات أو مندوب تسويق بيشتغل عدد ساعات محددة وأحياناً بيوصل رسالة غلط أو يتلخبط في المعلومات .. لكن الويبسايت شغال ٢٤ ساعة طول أيام الأسبوع، والمعلومات اللي في الويبسايت دي متراجعة أكتر من مرة وصحيحة.

sales funnels & رحلة العميل 🔗

في حاجة في التسويق اسمها رحلة العميل ، وهي ببساطة إن العميل محتاج محتوى مختلف في كل وقت عشان تشجعه يوصل للمرحلة اللي بعدها. يعني مثلاً في البداية العميل محتاج يعرف شركتك والمنتج اللي بتقدمه ، المرحلة اللي بعد كده يعرف مواصفات المنتج وشكله ، المرحلة اللي بعدها يعرف إن في ناس تانية اشترت المنتج ده و ده رأيهم ، .. وهكذا. انت بتاخد العميل من إنه لسه ميسمعش عن شركتك لحد ما يوصل لمرحلة الشراء.

تصميم الـ sales funnels و رحلة العميل سهل وقوي في الموقع الإلكتروني الخاص بشركتك. وده بيزود مبيعاتك بشكل منتظم. وتقدر تعمل قياس لمدى كفاءة الـ landing pages و اقناع العملاء. وتطور من طرق العرض وشرح المنتج.

e-commerce البيع اون لاين 🔗

بعد تعرض العالم لجائحة كورونا ، الناس كلها اتعلمت إنها لا تعتمد على طريقة واحدة لبيع المنتجات. بيع في أرض الواقع ، وبيع أون لاين على متجرك الإلكتروني (أو اعرض منتجاتك على الويبسايت) ، وبيع كمان في متاجر الشركات الأخرى مثل أمازون و جوميا و نون. تعدد قنوات البيع هام جداً لإستمرارية البيع رغم الظروف وكمان للتسهيل على العميل إنه يشتري المنتج بالطريقة اللي تناسبه هو.

الخُلاصة 🔗

بلاش تعتمد على قناة تسويق واحدة! حاول أن تستخدم الويبسايت (قناة التسويق اللي تملكها) بالإضافة إلى واحدة أو أكثر من باقي قنوات التسويق مثل فيسبوك ، واتساب ، انستجرام ، يوتيوب ، تويتر ، تليجرام ، .. وغيرها من قنوات التسويق الكثيرة جداً.

مشاركة: